Heiliger Krieg

As Häilige Chrieg bezäichnet mä e Chrieg, wo dr Hauptgrund drfür religiöös isch, öbbe wenn as Grund aagee wird, ass er im Ufdraag vom ene Gott kämpft wurd und är e Hand het, in däm wo bassiert. Sonigi Gründ cha mä vilmol in Gsellschafte ghööre, wo die politische und religiööse Machthaber idäntisch oder äng verbunde si. Si sääge as Rächtfertigung für d Ordnig vo dr Gsellschaft, iiri Verdäidigung, Sterkig und/oder Expansioon, ass Gott es eso häig welle.

Dr Begriff isch im Hellenismus entstande und mä het en im Christedum sit em Hoochmiddelalter für d Chrüzzüüg brucht. In dr Nöizit het er au Chrieg legitimiert, wo nazionalistisch motiviert gsi si, im dütsche Sproochruum bsundrigs die antinapoleonische Befreijigschrieg, und het us ene e Kampf um e Wältaaschaujig gmacht.

In andere Religioone git s äänligi Konzept, im Islam zum Bischbil dr Dschihad. Die Begriff vergliicht mä vilmol mit däm, wo im christianisierte Öiropa entstande isch, aber in dr Forschig wärde si nit as idäntisch aagluegt. Au dr sogenannti Grächti Chrieg, wo an razionali ethischi Kriterie bunde isch, wird vom Häilige Chrieg underschiide.^[1]

1. ↑ Hans Richard Reuter: Heiliger Krieg III: ethisch. In: Die Religion in Geschichte und Gegenwart, Band 3, Mohr/Siebeck, 4. Auflage, Tübingen 2000, Sp. 1564f.